اولدی ای دل گنه هنگام سرور

دولدوروب اهل ولا قلبینی شور

گنه یولدان مه شعبان یتشوب

مُرده روح بشره جان یتشوب

بَهْجَته هر دل بی تاب گلور

باب عشقی آچون ارباب گلور

ای گدالر یتشوب وقت عطا

کرم ایلر هامیا شیر خدا

فُطْرُس طبعیم آچوبدور گنه پر

ایلیور گلشن جاناندا گُذر

دوزولوب جبهه ی افکاره عَرَق

ورورام دفتر تاریخه ورق

بو روایت که چکور نظمه قلم

چوخ کتاب لاردا اولوب ثبت و رقم

اولونوب بو خبر قُرَّۀُالعین

ثبت موسوعۀ کلمات حسین

که پیمبر او رسول مدنی

جان تک ایستردی حسین و حسنی

سسلنردی هامیا روشندی

من حسینیمدن اودا مندندی

بیر گون اول پادشه کلِّ نُفوس

همره شیر حق ایتمیشدی جلوس

ایکی سی صحبته سرگرمیدیلر

که همان بزمه حسین ایتدی گُذر

مسکن ایتدی اونا طاها قوجاقین

هم ئوپوب آنّینی هم گل دوداقین

گوردی بو صحنه نی تا شیر خدا

عرض ایدوب ای شه فرخنده لقا

بویور ای وحی سراسر سخنی

بالامی چوخ سووسن یا که منی؟

گُل بوداقینده گلوب قُمری دیله

ویردی پاسخ او امیر ازله

دیدی یوخ شکّی بو شاه مدنی

سندن آرتیق سووَر البته منی

دیدی گفتاریوی اثبات ایله

منله گل ایندی مُباهات ایله

دیدی آماده یم ای شاه ولا

بو مباهاتی بابا سن باشلا

سنه هاردا تاپلار تای بابا جان

بیر به بیر فضل لرون سای بابا جان

نه بویورسان سنه احسن دیرم

انتهاده نچه سوز من دیرم

بولونر فرد مُقَرَّب کیمدی

ختم مُرسل ئوزوده حاکمدی

مرتضا سویلدی من شیر حقم

سَیفُ الاسلامم شمشیر حقم

سابِقون جمعینه من صف باشیام

احمدین یاوری هم قارداشیام

مُلک ایماندا امیرم بولوسن

مقصد روز غدیرم بولوسن

قویموشام کعبه ده دنیایه قدم

ایتمیشم مکّه نی من رشک اِرَم

سایدی یتمیش نچه فضلین مولا

اولدی خاموش او سلطان ولا

دیدی طاها او امیر حرَمِین

ای اولان عشق جگربندی حسین

سن اِشیتدون بالا حیدر سوزونی

که نجه ایلدی تعریف ئوزونی

بو فضایل که آتون ازبریدی

مین لر اوصاف علیدن بیریدی

او مزایا که بو ضرغامیده وار

سایماقیلان مگر اوغلوم قوتارار

قطره‌دور عالم علی دریادی

مرتضا عالی و هم اعلادی

گلدی گفتاره حسین بن علی

دیدی حمد ایلیورم لم یزلی

که بیزی طاهر و اطهر یارادوب

هامی عالم لره سروَر یارادوب

نه بویوردون باباجان دوزدی یقین

سنی عالم تانیور فرد امین

اِذن ویر ایندی بابا من دانشیم

دیوم ئوز فضلیمی روشن دانشیم

ویردی رُخصت اونا شاه مدنی

ایتدی طوطی کیمی شِکَّر شکنی

دیل آچوب نطقه او زهرا گزلی

من حسینم دیدی فرزند علی

جدّ پاکیم شه دین طاهادی

هامی دان شأنی اونون والادی

اشرف خیل بنی آدمدی

انبیا حلقه سینه خاتمدی

هامی عالم لر ایچیندن سچیلوب

اگنینه رخت رسالت بیچیلوب

پاک آنام فاطمه ی زهرادی

نه بشر، انسیه ی حورادی

رتبه ده محور خلقتدی آنام

هامی حُجت لره حجتدی آنام

صاحب رتبه ی شایاندی ئوزی

مفخر و سرور نسواندی ئوزی

بَضعه ی پیکر پیغمبردی

حقدن اعطا اولونان کوثردی

نَفَسی عالمه ویرمیش برکت

یر گوی ایلور اونا خاطر حرکت

بس بو جمله منیم اجلالیمه دی

او حسینم که ننم فاطمه دی

باباجان باشیوه آخر دولانیم

حامل وحی دی لای لای چالانیم

خدمت ایلوبدی منه جبرائیل

حرمت ایلوبدی منه اسرافیل

من بَلَکده گویه معراج ایدنم

عالمی جودیمه محتاج ایدنم

فطرسه شهپر رفعت ویردیم

یر گویه سفره ی رحمت سردیم

گر چه تصدیق ایدیرم هر سوزوی

زحمته سالما بابا چوخ ئوزوی

دگلم راضی بابا اینجیه سن

ایندی هر قَدْر ئوزوندن دیه سن

ئوزوی سن دیمه توصیف ایدوسن

آتامی سن بابا تعریف ایدوسن

سنه ده وار یری گر فخر ساتام

که بو عالمده منیم سنسن آتام

هم آنوندان منیم اشرفدی آنام

هم آتوندان منیم اعلادی آتام

باشدی جدّیم هامی اجدادوندن

اودی پیغمبره محبوبم من

قارداشون دوزدی سنون جعفردی

عدنیده مرغ زُمُرُّد پردی

عمومون رتبه سی عزّتدی

سنه شأنی حاشا یته جاه حسنه

دوزدی جعفرده اوجالدوب باشیمی

گورسه محشرده ولی قارداشیمی

حقدن ایستر او دل حسّاسی

بی گمان مرتبه ی عباسی

بِلیمی داغی اونون سندراجاق

رشته ی چاره می یکسر قیراجاق

بیر باجیم وار که سُخَنوَردی بابا

آناما حُجبیده مظهردی بابا

آنام ایندی اونی ارشاد ایلیور

اونی علامه و استاد ایلیور

علم و ایماندا اوجا رُتبه سی وار

تیغ بُرّا مَثَلی خطبه سی وار

دام عشقیمده گرفتار اولاجاق

بعدِ عبّاس علمدار اولاجاق

سنون ای پادشه یوم شُمار

بویور آیا بِله بیر باجون وار؟

او کتابی که پیمبر گتیریب

اونلا انسانی فلاحه یتیریب

وورارام قانیله شیرازه اونا

ویررم بیر نفس تازه اونا

قانیلن مُصحفی امضا ایدرم

جدّیمون مکتبین احیا ایدرم

توکدی رخساره علی گوزیاشینی

ئوپدی مهریله حسینین باشینی

مهر طاهاده گلوبدور جوشه

چکدی جان تک نَوَه سین آغوشه

قلبینی قلبینه ممسوس ایلدی

حسرتیلن دوداقین بوس ایلدی

یره صدریندن اونی قویمادی هیچ

نه قدر ئوپدی ولی دویمادی هیچ

دیدی ای گوهر گنج نبوی

آیری یرده ویررم جایزه وی

هر زمان گلشن عمرون صولدی

بو گزل گوزلریوه قان دولدی

اوندا که قانیوه غلطان اولدون

کوفه¬ده خولیه مهمان اولدون

اوندا که ای ثمر نخله ی نور

اولدی ستر باشوا خاک تنور

قلبیده بذر محبت اَکَرَم

یارالی باشیوه من باش چکرم

آغلاماقدان دیمه من دینجه لرم

انبیائیله تنوره گلرم

عدنیدن ای گل یکدانه اوغول

گلرم شام غریبانه اوغول

یوزوه اشکیمی تز تز سَپَرم

بُرجوم اولسون یوزون اوردا ئوپرم